ПОСОЛЬСТВО РЕСПУБЛИКИ АБХАЗИЯ В БОЛИВАРИАНСКОЙ РЕСПУБЛИКЕ ВЕНЕСУЭЛА | Embajada de la República de Abjasia en la República Bolivariana de Venezuela
1050, Kapakac
embabjasia@gmail.com


+58 412 960 0726
+58 212 910 0047
+58 412 201 8580


Ашьапылампыл азы адунеи ачемпионат ConIFA 2016 ҳаракыла иаартын иахьа лаҵарамза 28 аҽны, Аҟәатәи астадион “Динамо” аҟны.



АҞӘА, Лаҵарамза 28. Ашьапылампыл азы адунеи ачемпионат ConIFA 2016 ҳаракыла иаартын иахьа лаҵарамза 28 аҽны, Аҟәатәи астадион “Динамо” аҟны. Аныҳәа иалахәын Аԥсны анапхгара, ConIFA апрезидент Пер Андерс Блинд, ашьапылампыл абзиабаҩцәа аӡәырҩы.
Аофициалтә хәҭа ашьҭахь ачемпионат аиҿкааҩцәеи алахәылацәеи, акыр зҵазкуа аныҳәа аартра рыдиныҳәалеит Аԥсны аҳәынҭқарра ахада Рауль Ҳаџьымба.
“Иахьа Аҟәа имҩаԥысуа жәларбжьаратәи аспорт ныҳәа ус дууп ҳтәыла аҭоурых аҟны. Уи аҽазыҟаҵара мҩаԥысуан ҭакԥхықәра дула. Ихьыԥшым ашьапылампыл хеидкылақәа рфедерациа ҳтәылаҿы имҩаԥнаго ачемпионат иаргәырӷьеит аԥсуа жәлар. Ҳара ҳмилаҭ ашьапылампыл иамоуп атрадициа бзиақәа, аԥсуа шьапылампыл асыҩцәа рҟазара акырынтә ишьақәдырӷәӷәахьеит. Аҵыхәтәантәи ашықәсқәа рзы ҳтәылаҿы ирызҳаит ашьапылампыл иазҿлымҳау аҿар. Агәра згоит уаанӡатәи аиааира дуқәа еихазҳауа аспортсменцәа зну амҩаҟны аихьӡара ҿыцқәа шаадырԥшуа. Арҭ амшқәа раан ҳтәылаҿы ConIFA амчала имҩаԥысуа ахәмаррақәа шьаҿа ӷәӷәаны иҟалоит аԥсуа спорт абираҟ иҳаракны ашьҭыхраз”, — ҳәа иҳәеит атәыла Ахада Рауль Ҳаџьымба.
ConIFA апрезидент Пер Андерс Блинд ачемпионат аиҿкааҩцәа иҭабуп ҳәа реиҳәеит.
“ConIFA аилазаара иҭабуп ҳәа шәарҳәоит ас ҳаракыла ачемпионат амҩаԥгара шәҽахьазышәшәаз. Араҟа имҩаԥысуа зегьы адунеи иахаҵәартә еиԥш иҟарҵоит аҳәаанырцәтәи ажурналистцәа. Иҭабуп атәыла анапхгара адкыларазы”, — ҳәа иҳәеит Пер Андерс Блинд.
Ашьапылампыл азы адунеи ачемпионат ConIFA 2016 аартра аофициалтә хәҭа мҩыԥысуан сааҭк иназынаԥшуа. Аныҳәа аартра ахәаԥшраз имҩаҳыҵаз хыԥхьаӡара рацәала ахәаԥшцәа идырбан акырӡа илахҿыхыз игәылҭәааз апрограмма, уи иагәылагалан аԥсуа жәлар рхаҿра, рмилаҭ, ркультура уҳәа ртәы зҳәоз ақәыргыламҭақәа. Аԥсуа естрадатә шәаҳәаҩцәа инарыгӡеит ачемпионат агимн.
Лаҵарамза 29 аҽны ирылагоит ачемпионат ахәмаррақәа.

Sputnik Аҧсны: http://sputnik-abkhazia.info/apsny/20160529/1018476937.html#ixzz4A5MwtnNt


Май 29, 2016 - 9:51 пп | Slider | новости |

СОЮЗНИКИ САЙТЫ